ظروف الحياة أتغيرت و الناس كمان أطباعها أتغيرت و كثرت السلبية بحياتنا، لا عادت الحياة بسيطة ولا الشغل سهل و لا تحمل مسئولية الحياة سهلة. أمور كثير مختلفة تأثر على طريقتنا في التعامل مع ضغوط الحياة اليومية و بدي ياكم تسألوا حالكم سؤال
هل لو كنتي في سباق أو تحدي تحبي تكوني الفائزة أم الخاسرة؟ أكيد بدك تكوني الفائزة لهيك بدي ياكي تتعاملي مع الضغوط اليومية كأنها تحدي و يكون من داخلك عندك قناعة أنك رح تقدري تكسبي االتحدي وأنك قوية
أتذكري شغلة كثير مهمة و هي أن المشاكل موجودة ولا محال من الفرار منها ولكن ممكن تتعاملي معها بابتسامه أو بدمعة وهيدا هو الاختيار اللي لازم تسويه
رح أخبركم عن شي صار معي أنا شخصياً اليوم
اليوم كان عندي نص يوم شغل، يعني بس دوام ٤ ساعات فقلت استغل الفرصة و أروح أقص شعري و أسوي أظافري و طبعاً شعري أسويه بصالون وأظافري بصالون ثاني و أسوي هيك لأن صالون الشعر ما عندهم موظفات أظافر شاطرين و صالون الأظافر ما عندهم موظفات شعر شاطرين، المهم ندخل بالموضوع
طلعت من الشغل، وأنا رايحة صالون طوني مندلق تبع الشعر و اللي موجود بفندق سانت ريجيس بدبي لقيت مدخل الفندق الجانبي مسكر لفيت لفه طويلة بالسيارة لأنهم مسويين تصليحات بالمنطقة، المهم نزلت و دخلت الفندق وصلت عند الأسانسير و أنا مستغربه المكان المهم سألت موظف الأمن هل هيدا هو فندق سانت قلي لا
طلعت موقفه بالفندق اللي جنبه المهم طلعت و ركبت سيارتي و لفيت لفه طويلة ثانية حسب الإرشادات اللي عطاني ياها موظف الأمن لحتى وصلت
طلعت فالتقيت مع الكوافير المبدع فارس و اللي بيصبغلي شعري وحكالي أن في ٢٠ دقيقة تأخير، قلتله ما في مشكلة
المهم صبغت وقصيت و سشورت و عآخر تكه فضى شحن موبيلي
قلت مو مشكلة رح أشحن بالباور بانك اللي عندي بالسيارة، نزلت السيارة لقيت اني ناسيه الواير، قلت يا مسهل خلاص لما بروح الصالون تبع الأظافر رح أشحنه
ركبت السيارة و ما في نص كيلو الا وقفت السيارة و أضطريت أوقفها في مكان مخالف طلع خلص البنزين فيها و ما كنت منتبهه، قلت كل تأخير فيه خير ان شاء الله
المهم نزلت من السيارة و حوطتها بالأقماع ( اللي بيكونوا موجودين بالشوارع) و ضليت أنتظر تكسي للقيت ورحت الصالون الثاني
خلصت أظافري، طلعت وقفت شي ٢٠ دقيقة بالشارع أدور تاكسي، بالأخير لقيت ورحت جبت بنزين من المحطة
التاكسي وهو عم يوصلني للسيارة وقف على اشارة طلعت مو شغاله و ضليت ربع ساعة بالتاكسي منتظره يفتحوا الطريق
المهم وصلت للسيارة و وقفت مثل الشاطرة أعبي بنزين بالسيارة و شكلي كان يضحك و أنا عم قص زجاجة ماي فاضية بمقص الحواجب عشان أسويها مثل قمع لأحط بنزين وطبعاً غرقت حالي و بس خلصت عطول ركبت السيارة و طيران رحت صبيت بنزين كامل بالسيارة في محطة البنزين و بالأخير روحت بعد ٦ ساعات من الحظ المتعثر
لو تلاحظوا اليوم كله من بدايته لنهايته كان معاكس معي بس اللي أنا عملته هو اني أخدت كل موقف بضحك مع أني والله كنت تعبانة و رجلي من الكعب العالي كانت ورمانه بس ما حكيت حكي سلبي لحالي مثل ليش عم يصير معي هيك ولا بكيت و لا اتصلت بحد ليساعدني و أتعاملت مع كل موقف على حدى و بسطته و فكرت بالحلول بدل ما أفكر في المشكلة نفسها
نصيحة ميثاوية:
تقدري تتعاملي مع ضغوط الحياة اليومية اذا قدرتي تتبعي هالثلاث خطوات
١- الصبر و التروي
ما تستبقي الأمور و خلي كل شي ياخد وقته الطبيعي و خليكي على يقين أن بداية يوم جديد هو عبعد ساعات قليلة و أن الغد أفضل دائماً فترقبي الغد بايجابية و تعاملي مع اليوم ببساطه و كأنه طفل عم تتعاملي معه ليسمع كلامك
٢- التحليل المنطقي
لا تعطي الأمور البسيطة أكبر من حجمها و حللي المشكلة و ضعي لها حلول منطقية و انسي المشكله و فكري كيف تطبقي الحلول
٣- التنظيم
لا يكلف الله نفساً الا وسعها، رتبي مهامك اليومية من ١ إلى ١٠ مع وضع المهام الأهم بالأولوية و بلشي يومك بتنفيذ مهمه واحده و ضعي كل طاقتك فيها و بعد الانتهاء منها انتقلي للمهمة اللي بعدها
بالأخير حابه قلكم ان كل الضغوط اليوميه مهما كانت صعبه هي قدر وهنا انتي مسيره و لكن ما تنسي انك مخيره في التعامل مع الضغوط فاختاري التعامل مها بالصبر، التروي، التحليل المنطقي، والتنظيم و أهم شي بابتسامه لأنك بتحدي فائزة فيه لا محاله
ما تنسووا تتابعوني على الانستغرام
Maitha_abduljalil
وعلى السناب جات
Maithaabduljali
أختكم ميثاء عبدالجليل