• ميثاء عبد الجليل

10 خطوات للتخلص من السموم بالجسم (ديتوكس)


مرحبا حبيباتي، طبعاً لا يخفى عليكم قراري بعملية الشفط الكاملة اللي سويتها بكوريا عشان أتخلص من الدهون بالجسم مع العلم أن وقت اجراء العملية كنت واصلة لأعلى وزن وصلته بحياتي حتى بشهور

حملي المهم مع هالقرار اللي أخدته أخدت معاه قرار بتغيير نظامي الغذائي و عاداتي الخاطئة لعادات صحية

ومن هون حبيت أحكيكم عن الديتوكس اللي الكل طايحين فيه و مثل ما بتعرفوني لازم لما أحكي عن الموضوع أكون فاهمته و دارسته لأن العلم هو سر النجاح للوصول لأهدافك

اليوم رح أخبركم عن الديتوكس بالتفصيل لحتى نتعلم و نعرف عنه أكثر

شو هو الديتوكس؟ هو عملية التخلص من السموم المتواجدة و المتراكمة بالجسم، تخيلوا كيف نحن بنتحمم لنغسل جسمنا أو بنغسل أسنانا لنظفها فهاي الأمور تعتبر تنظيف خارجي للجسم. الديتوكس هو تنظيف داخلي للجسم من السموم

شو هي السموم؟ هي المعادن، المواد الكيميائية، الملونات، صبغات الطعام، المبيدات الحشرية وكل شي يدخل الجسم و يعتبر ضار فهو سموم

كيف تدخل السموم للجسم؟ أكل أطعمة فيها صبغات هي سموم متراكمة بالجسم، أكل خضروات أو فواكة مرشوشة بميدات هي سموم، عملية استنشاق هواء ملوث مثل عادم السيارات هي سموم، شرب مياة مكررة هي سموم. وبما أنه ما في طريقة نحمي نفسنا من السموم فهون يجي دور الديتوكس

ما هي أعراض تراكم السموم بالجسم؟ الكسل المستمر، تهيج البشرة، الحساسية الفجائية، النفخة أو التخمة، اضطرابات الدورة الشهرية، وقلة التركيز هي كلها مؤشرات لضرورة تنظيف الجسم من السموم

وظيفة التنظيف الطبيعية للجسم

عملية الديتوكس هي وظيفة طبيعية بالجسم وأهم الأعضاء اللي تقوم فيها هو الكبد اللي بيعمل كفلتر للسموم و البكتيريا. مع العلم ان في كثير أعضاء بالجسم تشارك الكبد في عملية التخلص من السموم مثل الجلد، الأمعاء،وغيرها من الأعضاء

مبدأ عمل الديتوكس

لحتى نعمل ديتوكس باختصار نحن لازم نقلل من السموم اللي بتدخل الجسم و بنفس الوقت نحفز الأعضاء اللي بتعمل على تنظيف الجسم داخلياً أنها تشتغل بكفاءة أكثر

طرق الديتوكس

طرق مؤقتة: وهي عبارة عن نظام يتبع لفترة قصيرة وهو الأكثر انتشارا مثل تناول الفواكة فقط لمدة اسبوع، ديتوكس الماء، ديتوكس حليب الابل لكن برجع وقول هاي طرق مؤقتة لهيك أنا ما رح أحكي عنها و رح أحكي عن الطريقة اللي بشوفها أمثل وأفضل

طريقة دائمة: وهي الطريقة الأمثل وتكون من خلال تغيير نمط حياتنا الغير صحي إلى صحي تدريجيا بحيث نقدر نتبعة بشكل دائم

عشر نصائح للتخلص من السموم بشكل صحي

أولاً: شرب 2 ليتر من الماء يومياُ مضاف لها شرائح الليمون لأنها بتساعد على سد الشهية، زيادة معدل حرق الدهون، وتحسسكم بالشبع

ثانياً: الرياضة 3 مرات بالاسبوع و لو ما كنتي بتحبي الرياضة فبيكفي أنك تزيدي من معدل حركتك يعني بدل الاسانسير أطلعي عالدرج وبالمول بدل ما تطلعي على الدرج الكهربائي أطلعي عالعادي، لو السوبرماركت قريب منك بدل ما تروحي بالسيارة ولا تطلبي بالموبيل أتمشي لعنده. حاولي تلاقي أشياء ضمن يومك وأعمليها بشكل مختلف

ثالثاً: التقليل من السكريات تدريجياً و استبدلي السكر الأبيض بالسكر الخاص بالريجيم

رابعاً: حطي بالبيت منقي هواء عشان ينقي الجو من الملوثات

خامساً: ما تنسي أنه الجلد هو أكبر عضو بالجسم و دورة هو حماية الجسم و التخلص من السموم من خلال التعرق لهيك أنصحك أنك تسوي سونا أو تلبسي بدلة السونا مرة بالإسبوع لحتى تساعدك على التعرق و لازم نكون عم نشرب ماء كثير لحتى ما يصيب الجسم جفاف

سادساً: بما أنه الجلد بيتخلص من السموم من خلال المسامات فوجود الجلد الميت على البشرة اللي بيسكر المسامات ما بيخلي السموم تطلع من الجسم لهيك تقشير الجسم بشكل أسبوعي جدا مهم

سابعاً: تناول حبوب فيتامين سي لأنها بتعمل على تحفيز الجسم لانتاج مادة الجلوتاثيون اللي بدورها بتعمل على التخلص من السموم بشكل طبيعي

ثامناً: تناول اللحوم البيضاء أكثر من اللحوم الحمراء يعني كلوا دجاج أكثر من اللحم و طبعاً الأسماك لا يعلى عليها و ياريت تكون رقم 1 قبل الدجاج

تاسعاً: استبدال الأطعمة الغير صحية لصحية يعني لو جعتي بين الوجبات كلي كمية كبيرة من الخس و الخيار، استبدلي المكسرات المملحة بالغير مملحة، بدل شرب المشروبات الغازية أشربي عصائر طبيعية، بدل ما ناكل خبز أبيض ناكل أسمر، بدل ما ناكل وجبة ناكل ثلاثة يومياً بأوقات منتظمة، حبيتي تاكلي شي حلو بدل ما تشتري لوح شوكولا كلي فواكة أو تمر أو حتى فواكة مجففة

عاشراً: التقليل من القهوة و استبدالها بالشاي الأخضر لأنها رح تساعد في حرق الدهون و التخلص من السموم

العشر خطوات مو نظام مؤقت هي عبارة عن تغيير بنظام حياتك، لازم تاخدي قرار أنك تكوني نشيطة ذكية باختيار أكلك وأنا حابة اني أكون شخص عم يشجعكم لحتى تعيشوا حياة صحية و بعرف كل شي صعب بالبداية و المغريات كثير لكن الإرادة فوق كل شي

بتمنالكم حياة صحية

أختكم ميثاء عبدالجليل

#ديتوكس #ميثاءعبدالجيلي #التخلصمنالسمومبالجسم #ريجيم #العنايةبالجسم #ماهوالديتوكي #detox #10bestdetoxtips