• Maitha Abduljalil

عجلة الألوان وعلاقتها بالمكياج


في أغلب الأحيان بنشتري أدوات مكياج سواء كانت كريم أساس، ظلال عيون، أحمر خدود، أو أحمر شفاه ونكون كتير مبسوطين من الدرجات بس لما نجرب الدرجات نلاقيها مو مناسبة لالنا و أحيانا تخلي شكلنا نفس المرضى و هيدا كله مرتبط بالاختيار الخاطئ للأدوات من حيث الألوان، لو ركزتوا معي بدرس اليوم كتير رح تستفيدوا و رح تقدروا تشتروا كل شي بذكاء و رح توفروا حق المنتجات اللي عم تشتروها من غير ما تستخدموها، خلينا نبلش

قبل أي شي و عشان نفهم عجلة الألوان لازم نحدد الأندرتون الخاص فينا، يعني سواء أندرتون بارد، دافئ ، أو طبيعي يعني يجمع ما بين البارد و الدافئ

كيفية معرفة الأندرتون

الطرق كتير لكن أبسطها هي انكم تشوفوا لون الأوردة في الأيد من الداخل لو لونها أخضر يعني الأندرتون دافي و لو أزرق يعني الأندرتون بارد و لو ما عروفتوا تفرقوا

يعني الأندرتون طبيعي و في طريقة ثانية كمان و هي أنكم تراقبوا لون الأكسسوارات و المجوهرات اللي عندكم لو أكثر شي بتحبوا الذهبي و بتحسوه أحلى عليكم فمعناه ان بشرتكم دافية أما لو بتميلو لللون الفضي فبشرتكم باردة ولو بتحبوا الأثنين و بتحسوا ان اللونين حلوين عليكم فمعناه أن بشرتكم طبيعية، وطبعا حابة ألفت أنتباهكم أن المكياج يتبع قاعدة أنه ما له قواعد و لكل قاعدة شذوذ

عجلة الألوان

عجلة الألوان تنقسم الي قسمين قسم الألوان الدافية و قسم الألوان الباردة

الألوان الدافية هي الأحمر، الأورنج المحمر، الأورنج، الأصفر المائل للأورنج، الأصفر

الألوان الباردة هي الموف، البنفسجي، الازرق، الأزرق المخضر، الأخضر، الأصفر المخضر أو الليموني

الألوان المكملة لبعض في عجلة الألوان

هاي الشغلة كتير رح تساعدكم بالمكياج، عشان تعرفوا الألوان المكملة، الطريقة كتير سهلة و هي انكم تختاروا لون وتشوفوا اللون المقابل لاله في عجلة الألوان اللون المقابل للون الأخترتوه هو اللون المكمل

مثال: اللون الأحمر اللون المكمل له هو اللون الأخضر لأن هو اللون اللي يقابلة بدائرة أو بعجلة الألوان، اللون الأزرق المكمل لاله هو اللون البرتقالي و اللون البنفسجي المكمل لاله هو اللون الأصفر وهكذا

قاعدة الألوان و كريم الأساس

لو استخدمنا ألوان باردة على بشرة دافية النتيجة بتكون بشرة باهتة و بيطلع المكياج مو بنفس الجمالية لما نستخدم ألوان دافية و حتى كريم الأساس لو أشترينا درجة باردة ( درجة مايلة علي وردي) و نحطها على بشرة دافية بتطلع رصاصي و باهتة، و نفس الشي لو أشترينا كريم أساس دافي ( درجة مايلة على صفار) وحطيناها على بشرة باردة بتطلع البشرة رصاصي و باهتة، أتمنى تكون الفكرة وصلتكم

قاعدة الألوان و تغطية عيوب البشرة

الكونسيلر بحد ذاته يساعد على تغطية العيوب بالبشرة لكن في بعض الأحيان ما هو كافي، أحيانا بنحتاج شغلة أسمها الكوموفلاج أو مصحح اللون، اللي هو بكل بساطة بيساعد أنه يوازن لون المشكلة وهون نحن عم نحكي عن الألوان المكملة

مثال: هالات سودا و اللي هي لونها أزرق، شو اللون المكمل لها بعجلة الألوان رح نلاقي اللون البرتقالي لهيك مصحح الهالات لونة برتقالي

مثال ثاني: أحياناً كتير بنات يسألوني المصحح البنفسجي لشو؟ الاجابة هي لو شفنا لون المصحح بعجلة الألوان رح نلاقي اللون المكمل لاله هو الأصفر يعني هو يوازن اللون الأصفر فبالتالي هو يستخدم للبشرة الباهتة الخالية من الحيوية

مثال ثالث: المصحح الأخضر، نرجع لدائرة الألوان الأخضر مكمل للأحمر يعني المصحح الأخضر يستخدم عشان يوازن المشاكل الحمرا مثل شو؟ مثل الحبوب، الوحمات

و تبعا لقاعدة اللون المكمل نقدر نعرف كتير أشياء ما كانت تخطر على بالنا

قاعدة الألوان و أحمر الخدود

أختيار درجة باللون البارد على بشرة دافئة بتخلي المكياج شكلة مو حلو و بتحسوا كأنه في نشاذ بالمكياج، البشرة الباردة يليقلها الدرجات الباردة و العكس صحيح

مثال اللون الوردي البارد اللي داخل بتركيبتة اللون الأزرق ما يليق على اللي بشرتهم دافية أما البرونز فشكلة كتير حلو للي بشرتهم دافية و صعب الدمج على اللي بشرتهم باردة و يتطلب مجهود كبير

قاعدة الألوان و ظلال العيون

من أسهل الطرق لحتى تبرزي لون عينك أو العدسات هو أنك تختاري لون مكمل للون العين

مثال: لو لون العين أزرق أو العدسات زرقا و بعد ما نتطلع لعجلة الالوان رح نلاقي أن الدرجة المكملة للأزرق هي الدرجات البنية، النحاسية أو البرونزية، و هي أحلى درجات تبرز العين الزرقا

مثال آخر: لون العيون الأخضر أو العسلي رح يلبقلة كتير الدرجات البنفسجية، الموف، والوردية

أما لو كنتوا من الصبايا اللي عيونهم بنية فأنتم محظوظين لأن كل درجات الألوان تليق عليكم

صبايا مو معنى كلامي أن الألوان الثانية ما رح تليق عليكم لكن الألوان اللي ذكرتها لكل لون عين رح تبرز شكل العين بطريقة أحلى من أستخدام درجات غير

قاعدة الألوان و أحمر الشفاة

البشرة الباردة أستخدمولها الألوان الباردة و العكس صحيح

قاعدة الألوان و الشكل الاجمالي للميك أب

يفضل دائما ان لما نعمل ميك أب أن يكون اللوك متناسق و متناعم يعني ما رح يكون حلو لو أستخدمنا درجات دافية على العين و باردة كأحمر خدود وروج أو العكس ما تفرق، حاولوا أن يكون كل المكياج متناغم يا من الدرجات الباردة أو الدافية

ان شاء الله صبايا تكونوا استفدتوا من درس اليوم

لكم مني كل الحب و التقدير

ميثـاء عبدالجليل


3154 عرض