مرحبا حبيباتي، اليوم حبيت أحكيلكم عن موضوع نحن كثير نهمله بس لاحظت أن السؤال تكرر على أكثر من مرة فحبيت أنزلكم الموضوع عشان لو أنتوا عم تعانوا من هالمشكلة تعرفوا كيف تتعاملوا معها
سبب جفاف المنطقة المحيطة بالعين
مثل ما كلنا بنعرف أن المنطقة المحيطة بالعين كثير حساسة فلما بنستخدم عليها أي منتج لازم يكون مناسب لها المنطقة، و يمكن ما تصدقوني لو قلتلكم ان 90% من سبب جفاف هالمنطقة هو استخدام غسول الوجه اللي بيحتوي على مادة الصابون (الكبريت)، أما الـ 10% فهي مثلا استخدام مواد مقشرة على المنطقة المحيطة بالعين، جفاف الجو أو جفاف عام بكامل الجسم
تنبيه
للأسف في كثير من البنات بيستخدموا كريمات الوجه للمنطقة المحيطة بالعين و هيدا الشي كثير غلط، تعالوا قلكم ليش؟ لأن هاي المنطقة المسام اللي فيها صغيرة كثيرعلى تركيبة الكريمات الخاصة بالوجه فأي شي تحطوه يبقى على سطح البشرة و ما تستفادوا منه
خطوات تجنب جفاف المنطقة المحيطة بالعين
ما تستخدمي منظف يحتوي على مادة الصابون، اشتري أي نوع مكتوب عليه خالي من الصابون
لا تستخدمي تونر للمنطقة المحيطة بالعين
اتفادي تقشير المنطقة المحيطة بالعين أو وضع عليها كريمات مقشرة مثل الريتينول
عند استخدام ماسكات الوجه اتفادي وصولها للمنطقة المحيطة بالعين
رطبي محيط العين بكريم مخصص للمنطقة
شرب ماء كافي على الأقل ½ 1 ليتر يومياً
علاج جفاف المنطقة المحيطة بالعين
بعد ما تغسلي وجهك،جففيه كله ما عدا المنطقة المحيطة بالعين خليها رطبة عليها شوية ماي بعدين حطي فازلين و نامي. بس تصحي رح تلاقي ان الجلد صار مرن و راح الجفاف وطبعا لو الجفاف كثير قوي فرح تحتاجي أنك تعيدي نفس الشي كل يوم بالليل لحتى يروح الجفاف
أختكم ميثاء عبدالجليل