البشرة هي أكثر ما يشغل بال المراهقين خاصتا الصبايا، و ما ننسى ان مظهر البشرة له دور كتير كبير في ثقتهم بنفسهم ، فبدورنا نحن كأمهات ان نخلي هاي الفترة سهلة على أولادنا، خليفة ابني عمره 13 سنة ما نسيت ابدا اول مرة سالني عن الحبوب و انه ليش هيك عم تطلعله و كيف يخليها تروح لانه ما بيحب يشوف حالة بالمراية بسببها، اللي حابة أحكية ان الموضوع كتير بيأثر نفسيًا عليهم و انا اليوم حبيت ألقي الضوء على هذا الموضوع عشان الكل يقدر يستفيد و تقدروا تفيدوا اولادكم و تخلوهم يمروا بهالفترة من العمر وهم مرتاحين
ماذا يحدث عند سن البلوغ؟
اللي لازم نعرفة ان البشرة بهيدا العمر بتتعرض لكتير من العوامل اللي بتغير شكلها و ملمسها، انا ما كتير رح ادخل بالأمور الطبية ورح حاول ابسطلكم الموضوع مثل ما أتعودتوا على
السبب الرئيسي في التغييرات بالبشرة هي الهرمونات، اللي بتخلي البشرة أمسك و الروابط مابين الخلايا السطحية أقوي بكتير لهيك بتكون بشرة المراهقين خشنة، أما بالنسبة للتأثير الثاني للهرمونات و الأهم هو انها بتخلي الغدد الدهنية سوبر نشيطة وهيدا الشي بيخلي الدهون تتراكم بالخلايا ونحن مع نظام حياتنا اليومي بنتعرض لأوساخ وأتربة و كلها بتتجمع بالمسامات
باختصار
دهون + أوساخ + أتربة + مكياج = بكتيريا
بكتيريا = حبوب و رؤوس سوداء
ليش بشرة المراهقين بتاخد وقت لحتي تبين عليها فعالية الكريمات والعلاجات؟
مثل ما قلتلكم لانها بهالفترة من العمر بتكون سميكة وقوية و خشنة، وهيدا الشي يتطلب انه نستخدم كريمات سوبر فعالة لتتغلغل بالبشرة
شو هي مشاكل بشرة المراهقين؟
الحبوب، زيادة في افراز الدهون، مظهر بشرة باهت وغير صحي
أنواع من المنتجات ضرورية للعناية ببشرة المراهقين
الغسول: مثل ما قلتلكم قبل ان سبب المشاكل الأكبر هو تراكم الزيوت، الأوساخ، والأتربة بالمسامات و اللي تسبب الحبوب لهيك أهم خطوة بالعناية بالبشرة هو أنه نتجنب أن يتراكم ما سبق في المسامات ، التنظيف يكون مرتين باليوم فقط لكل أنواع البشرة و 3 مرات للبشرة الدهنية
المنتجات المقترحة: طبعا تختاروا منتج واحد فقط
غسول نيتروجينا لأنه يساعد على ضبط مستوى الدهون بالبشرة زيادة ترطيب الأماكن الجافة منها
لاش عنده صابونة بالفحم رائعة تساعد على امتصاص الدهون الزائدة من البشرة
غسول من بادي شوب بزيت الشجر بيحتوي على حمض الساليسيليك لقتل البكتيريا المسببة للحبوب و قوامه كريمي فممتاز لإزالة المكياج
المرطب: مهم وضروري و للأسف كتير منا بيفكر انه مو ضروري خاصتا لو البشرة دهنية و الموضوع عكس هيك تماما فهو جدا مهم بس الأهم انه نعرف نختاره صح ويكون خالي من الزيوت
المنتجات المقترحة: طبعا منتج واحد فقط
مرطب خالي من الزيوت من نيتروجينا
مرطب من نيتروجينا بالجريب فروت وخالي من الزيوت
كريم ليلي للحبوب: يفضل انه يكون فيه مكون اسمه بنزويل بيروكسيد عشان يقتل البكتيريا، هالكريمات في منها نوعين ، نوع يوضع على كل البشرة ونوع يوضع فقط على الحبه وما يتوزع على كل الوجه بسبب مكوناته اللي جدا قوية، والنوعين بيسببوا جفاف البشرة لهيك خطوة الترطيب جدا مهمة
المنتجات المقترحة
جل سوبر سبوت من اوريجينز و هيدا الجل يوضع فقط على الحبة الملتهبة ومو على كل الوجه لانه بيحتوي على كحول، هيدا الجل انصح فيه لانه بيحتوي على المكونات الفعالة و الضرورية لقتل البكتيريا و مكونات ثانية بتزيل احمرار الحبة بشكل فوري
السيروم الليلي من فريش سكين وهيدا السيروم للاستخدام على كل البشرة ليلا ، يحتوي على مكونات تقتل البكتيريا، ترطب البشرة و تغذيها بنفس الوقت
واقي الشمس: اضرار الشمس على البشرة اللي بتصير أثناء فترة المراهقة بتاخذ سنين لحتى تتعالج لهيك بنصح انه نتفادى هيدى المشكلة من الأساس ودايما بنصح انه على قد ما نقدر نحاول نتجنت نتعرض للشمس من 10 الصبح للساعة 2 الظهر
المنتجات المقترحة
SPF50 واقي الشمس من كلارينس
خطوات العناية ببشرتك
صباحا: الغسول ثم المرطب ثم واقي الشمس
ظهرا: فقط للبشرة الدهنية الغسول مرة ثانية
ليلا: غسول، كريم ليلي
سووا
للصبايا ما تناموا ابدا بالمكياج
على الأقل لازم تشربوا من لتر ونص ماي ل 3 لتر
النوم لساعات كافية
اختاروا كريماتكم بعناية وتأكدوا من وجود المكونات هاي أو بعضها ضمن تركيبة الكريمات بينزويل بيروكسيد، حمض السيلاسيليك، حمض الهاليرونيك
للصبايا حاولوا اختيار كريم اساس مكتوب علية
non acnegenic أو non comedogenic
لا تسووا
ما تنظفوا البشرة بشكل مفرط لان هالشي يسبب الجفاف و الحساسية، مرتين باليوم لكل أنواع البشرة ما عدا الدهنية 3 مرات باليوم
ما تتعرضوا للشمس من دون واقي شمس
ما تلعبوا ابدا بالحبوب عشان ما تنشروا الجراثيم و البكتيريا
اتجنبوا وجود العطور، السالفيت، زيوت المعادن،نسبة كبيرة من الكحول ضمن مكونات الكريمات اللي تستخدموها
ما تكثروا كريمات بس اتبعوا الخطوات اللي حكيتلكم عليها
ان شاء الله الكل استفاد من هيدا الموضوع و اتمنى لكم يوم سعيد
لكم مني كل الحب والاحترام
ميثاء عبدالجليل