شرح مفصل عن فراشي المكياج واستخداماتها بطريقة سهلة وبسيطة

September 15, 2017

مرحبا يا عسولات، اليوم رح أحيلكم عن فراشي المكياج واستخداماتهم... اللي لاحظته أن كل المواضيع الموجودة على النت كلها تتكلم علي كل فرشة لحالها و استخداماتها أنا اليوم رح أطرح الموضوع بشكل مختلف لأن رح أتكلم مباشرتا عن الاستخدامات و شو الفرش المتوفره لكل استخدام و أفضل نوع بالنسبة لي و طبعا رح أحكيلكم عن المفضلات عندي لكن أنتوا طبعا فيكم تختاروا الطريقة اللي ترتاحولها

 

كريم الأساس:

 

طبعا بالفترة الأخيرة كثير طلعت أشكال من الاسفنجات و الفراشي لوضع كريم الأساس ورح تشوفوا بالصورة أنواع الفراشي و أنواع الاسفنجات المتوفرة و كل اللي بالصورة يستخدموا لكريم الأساس وكل وحدة تختار الفرشة اللي ترتاحلها  ، بالنسبة لي أفضل استخدم فرشة Cailyn  لوضع كريم الأساس و بعدين استخدم اسفنجة real techniques  رطبة و أطبطب على كريم الأساس اللي وزعته عشان تمتص الزيادة من الكريم وأفضل اسفنجة ريل تكنيك عن البيوتي بليندر لسبب واحد فقط و هو أنها بتفضل لوقت أطول يعني ما بتخرب بسرعة مثل البيوتي بليندر

 

فرش الكونسيلر

 

 

لاحظوا بنات كيف الفرش كلها متشابهه من حيث الشكل، فرش تختلف احجامها و تكون الفرشة مضغوطة يعني شعيرات الفرشة غير متناثره وطبعا الفرش الكبيرة للأماكن الكبيرة و الصغيرة للأماكن الصغيرة

 

فرش وضع الكونتور الكريمي و فرده

 

رح تلاحظوا ان كل الفراشي محددة عشان تساعدنا بوضع الكونتور في مكان محدد و كلهم تقريبا نفس الشكل بس كل ما كبرت الفرشة نقدر نستخدمها لمكان كبير و كل ما صغرت فنستخدمها لمكان صغير مثل ما أنا موضحالكم بالصورة، وبالنسبة لي ما عندي شي مفضل استخدم المتوفر أو حتى أصابعي ما في مشكلة

 

فرش وضع أحمر الخدود الكريمي والهايلايت الكريمي

نقدر نستخدم لها نفس الفرش الخاصة بكريم الأساس ما في فرق لأن نحن بنعامل كل الاساس بنفس المبدأ ما في فرق بس أتذكروا شغلة وحدة بس كل ما صغرت الفرشة بتفرد بمكانها و كل ما كبرت كل ما كان فردها على مساحة أكبر

 

فرش البودرة الحرة

 

و هون أنا بقصد البودرة الشفافة أو اللي فيها لون مثل البنانا الحرة واللي بنحطها عشان تثبيت كريم الأساس رح حطلكم صورتها مع الفراشي، كلهم تقريبا ليهم نفس الشكل وكل ما كانت الفرشة كبيرة كانت منيحة للوجه ولو صغرت الفرشة صارت منيحة لتثبيت الأماكن الصغيرة أو الدقيقة مثل حول الأنف، فوق الحاجب، تحت العين

 

البودرة المضغوطة ( أحمر خدود، كونتور، اضاءة)

 

هي البودرة اللي تيجي كومباكت بكل أنواعها بودرة اضاءة أو كونتور أو بودرة وجه يعني أي شي يجي على شكل بودرة كمان أحمر الخدود، اتذكروا القاعدة الأساسية كل ما كبرت الفرشة كبر المكان اللي تفرد فيه و كل ما صغرت فهي توزع المنتج اللي نستخدمه في مكان محدد.

مثال: لو حابين نستخدم برونزر على كل الوجه فبدنا فرشة كبيرة لأن المكان اللي بدنا نحط عليه كبير (الوجه) ولكن لو حابين نحط الهايلايت فنحن بدنا نحط على مكان محدد و صغير فبالتالي لازم نستخدم فرشة محددة وصغيرة فهمتوا على كيف

 

فرش الحواجب

رح تلاحظوا ان الفرش كلها مشطوبة بقياسات مختلفة و هون يرجع القانون اللي يشمل كل الفراشي، الفرشة الكبيرة رح تحطلي لون أقوى و أغمق و على منطقة أكبر و الصغيرة رح تحطلي لون أخف و بمكان أصغر فلو حاجبك خفيف خلي فرشتك صغيرة و لو كثيف فيكي تستخدمي فرشة أكبر

وطبعا الفرشة نفسها ممكن تستخدم لأكثر من استخدام يعني ممكن نستخدمها للأيلينر، لحتى نحط شادو أو  ظلال في مكان صغير مثل مدمع العين أو ظل قريب من خط الرموش السفلي أو ممكن نستخدمها لتنظيف محيط الحاجب بالكونسيلر يعني ما تسمعوا كلام اللي بيقلكم لازم يكون عندك مليون فرشة فيكي تستخدمي نفس الفرشة لأكثر من  غرض أهم شي تعرفي شو تأثير الفرشة و شو النتيجة اللي رح تعطيكي ياها

 

فرش الأيشادو

في منها نوعين نوع تكون شعيرات الفرشة مضغوطة و متماسكة وهي تستخدم للمكياج الكريمي أو المائي أو البيجمينت و كل الفرش لهم نفس الشكل باختلاف القياسات و القاعدة اللي حكينا عليها ثابته بكل الأحوال كل ما كان المكان اللي بشتغل عليه كبيرة بكبر فرشتي  و كل ما صغر بصغر فرشتي

 

والنوع الثاني هو  فرش بتكون مفروشة يعني شعيرات الفرشة بعيدة عن بعض و تستخدم هالفرش للمكياج البودرة و تبعا لنفس القاعدة و طبعا شكل الفرشة بيحدد وين أقدر استخدمها يعني لو فرشة  شعيراتها مضغوطة بتحطلي اللون اقوى مقارنتا بفرشة شعراتها مفرودة ومتباعدة أكثر

 

فرش الأيلينر

طبعا معروفة عند الكل وما بدها شرح أنا بالنسبة لي أفضل الفرشة التقليدية اللي هي أول وحدة من على الشمال و كل ما كانت شعرات الفرشة أقصر كل ما قدرتي تتحكمي بخط الايلينر أكثر وبالنسبة لي ماك هي أفضل ماركة لفراشي الأيلينر

 

فرشة أحمر الشفايف

أي نوع من الفراشي اللي بالصور يفي بالغرض

 

 

 

 

 

أتمنى أن موضوع اليوم فادكم والصراحة تعبت عليه بس تعبكم راحة

ما تنسوا تشتركوا بالمدونة عشان يوصلكم ايميل كل ما أنزل موضوع جديد

أختكم

ميثاء عبدالجليل

Please reload